真相揭秘！點解佢會發脾氣？

真相揭秘：點解佢會發脾氣？ 發脾氣只係外在嘅行為，反映咗潛喺水底下嘅一座山，點樣可以了解別人發脾氣…



真相揭秘！點解佢會發脾氣？

露茜亞 心理學、 輔導、教育、語言學、MBTI certified practitioner   現任教育顧問及培訓。酷愛觀察、熱衷反省、浮游於左腦與右腦之間的生活，從中成長，並探索人生的真、善、美！電郵：drluciayeung@gmail.com

星期日同朋友行街睇戲，睇戲中途佢問你口唔口渴，你答佢唔口渴，然後繼續睇戲。點知睇完戲出返商場後，你發現佢黑晒面，於是你問佢：「套戲唔好睇咩？」，佢粒聲唔出。你再問：「係咪唔舒服呀你？」，佢依然唔出聲，跟住自己走咗去買珍珠奶茶，自顧自咁飲。你百思不得其解，兼且開始嬲嬲哋，然後佢行前、你行後，大家一句嘢都無再講，就咁喺商場漫無目咁遊蕩。

 

唔知各位CG!有無覺得呢個情境有啲似曾相識呢？

 

其實每個人嘅行為，只係冰山露出水面嘅一角。「發脾氣」只係外在嘅行為，而發脾氣反映咗潛喺水底下嘅一座山。我們點樣可以了解別人發脾氣背後嘅原因呢？等我哋用以上嘅例子，探索冰山吓每一層蘊藏住啲咩啦！ 

 

•水面上： 行為（發脾氣）

•第一層： 感受（憤怒）

•第二層： 觀點（假設﹣唔使開口你就察覺到佢口渴，並買飲料俾佢，咁就代表你真正愛錫佢。） 

•第三層： 期待（被服侍）

•第四層： 渴望（被接納、被愛）

•最底層： 自我價值（有啲自卑﹣未能完全自我肯定）

 

套用以上嘅例子，朋友可能自我價值唔高，渴望你嘅愛去肯定佢嘅價值，於是期待你服侍佢去表達你重視她，對方嘅假設係：如果佢唔使開口你就察覺到佢口渴（呢個假設係關鍵！），咁你就係真正愛錫佢嘅朋友喇！當然，你唔係佢肚裏面條蟲，又點知佢口渴呢？於是你嘅忽略令佢感到失望、受傷害、憤怒同埋「不被愛」（呢個係死罪！）。對於你所犯嘅死罪，她嘅應付方式同行為（coping strategies)，就係我哋所講嘅「發脾氣」。

 

其他唔同嘅行為都有佢水底下嘅一座山，與其吵架/冷戰，不如換個角度，唔好一下子俾對方（或自己）嘅行為嚇怕，冷靜啲去了解水平線下嗰座山到底蘊藏咗甚麼渴望同假設，然後真正咁去「治本」，從而打破惡性循環，咁你就唔使再花時間去「治標」啦！

 

Related Articles: 

 

12星座發脾氣點應付？

犯眾憎！辦公室6大缺德行為

心理測驗：找出困擾源頭！

朋友終於「衰咗」，我暗中開心？

More from CosmoGirl!

由愛情到性、美容到時裝，盡在 cosmogirl.com.hk

作者 TEXT:露茜亞 | Cosmo Girl – 14小時前 (6 Nov 2013)


Article from : http://hk.lifestyle.yahoo.com/%E7%9C%9F%E7%9B%B8%E6%8F%AD%E7%A7%98-%E9%BB%9E%E8%A7%A3%E4%BD%A2%E6%9C%83%E7%99%BC%E8%84%BE%E6%B0%A3-021547331.html