amyyipcat 浪漫家貓 (er_doraemon): 事頭婆嚟啦！My dear Queen ! My dear Boos ! Prefect angel Queen Elizabeth II !

事頭婆嚟啦！
等雷震拿老師教大家一個英文生字：Curtsy，即係屈膝禮，亦即係見到尊貴嘅人，將膝頭哥微微屈曲以示尊敬之禮儀，可作動詞或名詞用，例如 The Prime Minister curtsied to the Queen (不過無出現到)，或 The little girl made a curtsy to the Queen (呢個細路就識大體，有咁做啦！乖！)

你唔識呢個字唔緊要，因為真係冇乜幾何用得著，雷震拿都係上個禮拜上網時發現有個民意調查，叫大家投票，覺得總理應唔應該 Curtsy to the Queen。我唔知佢講乜，查字典，明白啦！再睇新聞，明白哂！

話說英女王 Queen Elizabeth II 第 16 次到訪澳洲，好大陣仗。我哋個位好有性格嘅女總理 Julia Gillard 係機場迎接女王時，冇行屈膝禮，只係好「奇怪」咁介乎點頭同鞠躬之間，結果俾人媽叉，話佢冇禮貌，冇尊重皇室禮儀。阿好有性格嘅 Gillard 話唔一定要 Make a Curtsy，佢一早已諮詢專業意見，話同女王會面，唔係硬性規定要行屈膝禮，可以選擇自己覺得舒服嘅方法，咁阿總理話佢覺得鞠躬最舒服喎！

My Goodness! 我唔係阿好有性格嘅總理，我唔知佢做出呢個介乎點頭同鞠躬之間嘅動作係咪真係咁舒服，我淨係知道只係望住佢做呢個咁生硬咁突兀咁唔自然嘅動作，我睇得好唔舒服囉！第二日佢再同女王會面，又試係咁，先係門口同女王隔成丈遠嘅地方突然停低做出呢個介乎點頭同鞠躬嘅動作，再行前幾步嚟到女王面前，突然又重複多一次動作，My Goodness! 我知點解我睇得咁唔舒服啦！因為實在太似...... 太似...... 家屬謝禮啦！

其實 Julia Gillard 駛唔駛咁有性格呀？又唔見佢係捍衛澳洲價值觀時係個班乜都要劃時代大推翻的 Green Party 門前咁有性格堅持己見？咪又係因為要賣賬當還債結果出賣當初投 Labor Party 的選民利益！政治污糟邋遢，無論係香港立法會定澳洲國會都係一樣...... 但嚟到見國家最高元首 (澳洲係英聯邦國家)，佢就咁堅持要用自己舒服嘅方法，Come On! 佢呢個擇「易」而執，雷震拿好反感！

以下純粹雷震拿自己解讀：我哋呢位女總理，一向有自己的睇法，亦好滿意自己突破傳統的做法，所以佢選擇唔結婚，唔生小朋友，但同佢嘅男朋友一齊入住總理府 (不過最近啱啱俾人迫遷)，佢要傳遞嘅訊息係，新時代獨立女性唔一定要結婚生仔，但同樣可以有愛情有家庭，所以開頭時好多人都覺得佢好破格好鍾意佢囉。但好快，大家睇到佢嘅堅持會隨住選民嘅質疑而搖動，唔係話佢會考慮結婚生仔，而係好多選民質疑佢呢個未生過小朋友嘅高收入人士究竟明唔明白普羅家庭嘅真正需要，咁佢就開始出去做吓騷抱抱小朋友錫錫...... 咦！好似從來冇聽過佢話鍾意小朋友喎！當要 Sell Carbon Tax 以完成同 Green Party 的回報交易時，佢知道普羅家庭最擔心收碳稅後乜都加價，佢就推出一大籮減稅增加福利優惠，根本就係賄賂選民，我好睇佢唔起。

好啦，到見女王啦！終於可以自己話事啦！為了貫徹自己有原則與一般人不同的性格，佢就偏偏點都唔肯屈膝，以顯示天子庶民皆平等，等大家都覺得佢有 Guts...... 囉！不過雷震拿有陰謀論，我思疑佢進可攻退可守，皆因家陣澳洲有越嚟越多聲音要求脫離英聯邦，佢死對頭 Tony Abbott 點都誓死效忠英女王，阿 Gillard 咁識睇眉頭眼額，梗係唔表態，費時得失選民，但家陣企硬唔屈膝只堅持點頭鞠躬四不像，第時有乜風吹草動，即刻可以走出嚟攞威，兼作為自己支持脫離英聯邦的強力證據...... 唔掂！唔掂！

其實要 Make a Curtsy 有幾難有幾唔舒服呢？我唔覺得見到女王屈一屈膝就好卑微，我反而覺得呢個係基本禮貌。就好似你見到日本人，你知佢哋習慣鞠躬，你都會係 Say Hi 同 Bye 時鞠躬，係入鄉隨俗嗎？我覺得係本能反應，係尊重。

你睇，呢個準備見女王嘅小朋友就識大體啦！冇錯啦！Make a Curtsy 就好似跳完舞好有禮貌咁拿一拿條裙屈一屈膝咁啦！幾舒服幾 Elegant!

發完牢騷啦！做完維園阿嬸啦！咁雷震拿係選民嚟呀嘛！梗係有權表達意見！

講返英女王。尋日聽見同事講咗一句說話，非常非常有親切感，就係：「事頭婆嚟啦！」好耐好耐冇聽過有人稱呼英女王做事頭婆啦！記得細個雷震拿成日聽見 D 大人咁講，而政府學校政府機構都會掛上英女王後生時好似亞羅蘭姐嘅相，連電視台夜晚收爐都會打出事頭婆張相，但家陣？係香港仲邊到有呢支歌仔唱呀？都係得我呢 D 港英餘孽兼移埋民繼續係英聯邦國家生活又非常懷念英國殖民風味嘅維園阿嬸先會對事頭婆有感情啫！