amyyipcat 浪漫家貓 (er_doraemon): 鬧交唔緊要最好鬧得smart

好多時情侶因為某啲問題而鬧交，完全因為成件事根本在唔適當嘅情境下發生，又或者處理得唔夠恰當。其實只要留意一啲小細節，就可以把爭論變成健康嘅溝通，而唔係令大家嬲爆鬧分手嘅導火線。

1. 正確timing：唔好喺佢打機、煲碟、砌模型嘅時候無端端「撩」個問題出來。如果真係有嘢要討論，搵個大家都得閒的時間，或者直接問佢「可唔可以搵少少時間傾吓呢個問題？」。

2. 避免大吵大鬧：如果爭論期間有人開始提高聲線音量，就是「扯火」先兆，最好盡快提醒對方：「大家咁火好難處理問題，不如大家等冷靜落嚟先再討論。」

3. 不要翻舊帳：一件事還一件事，千祈唔好翻返N個月甚至N年前嘅歷史，亦唔好講「你從來都唔理我感受啦」之類嘅話，否則佢只會覺得你唔夠理性，夾硬撩交嗌。

4. 不要離題：一件事未講完又拉出另一件，只會鬧足10年都無結果。

5. 互相聆聽：如果大家同時都自說自話，根本唔會聽到對方嘅理由、想法同感受。呢種情況下嘅典型反應係「你聽我講嘢先」，但不妨轉個策略，說「好，我聽你講，但3分鐘後你都要俾機會我講，OK？」

6. 不要鬧到盡：就算佢有千萬個不是，連人格都鬧埋是係傷感情嘅，「Cheap精」、「賤人」等貶義嘅稱呼，一定要避免。

7. 不要隨便講分手：除非你真係想。這類「要脅」玩得多，對方會覺得你只係講吓，唔會當真。又或者，萬一佢答你「好呀，就分手囉」，你反而會不知所措。

amyyipcat 浪漫家貓 (er_doraemon)