黃子華棟篤笑講政治金句節錄 - 講佔中

Yahoo 娛樂圈 – 21時前

萬眾期待一連11場嘅《黃子華2014棟篤笑 唔黐線唔正常》喺噚晚正式開鑼，唔少人都知道男神嘅騷通常都會講政治,今次都唔例外大談政治講佔中。今日小編就節錄咗少少精彩內容分兩篇送俾買咗飛未睇同買唔到飛嘅朋友頂住癮先！

「倒抽一口涼氣，係我細個睇武俠小說先睇到呢啲字眼，通常係中咗毒嘅人先會咁講，佢忽然瞓醒，見到有隻西域蜘蛛咬緊佢大髀，忽然倒抽一口涼氣……係咪？呢啲中咗嘅字眼，依家香港成日聽到，香港依家中咗毒。」

「香港係有病，而呢個病，係視乎你睇佢有幾輕或幾重，去決定係佔中，定反中——呀，反佔中嘅位置。對唔住呀各位，我今日有嚴重嘅傷風，所以我食咗好重嘅傷風藥，好口乾……」

「即係你係佔中，定反佔中，係睇你，視乎香港呢個病有幾重。我聽過一男一女對話係咁嘅:『你想整容呀？整容可能變成毀容呀!』拿，信呢句話嗰個人，可能就係周融喇，唔好亂搞嘢，『毀融』。」

黃子華更直言有參與佔中，更大讚香港人有品質。
「我唔係同你講笑，我嗰日坐咗喺嗰度，隔籬突然有人講，我哋有壽司呀，依家仲未壞，晏啲唔敢擔保呀。咩服務呀？你覺得熱，有人埋嚟幫你噴嘢。要唔要凍貼……我唔知世上有凍貼呢樣嘢。『你唔係貼喺額頭，你貼喺頸架!』我真係覺得好感動。我睇住破咗健力士紀錄，有個人拎住廿樽水諗住周圍派俾人，不斷跌低，一秒之內樽水去番佢手度，一秒鐘!你係未見過有咁多咁義助嘅人!」

「真係要認清呢個事實。咁跟住嚟緊點呢？我就係想講，你去過呢啲地方，就知道香港有吹神，我哋證明咗我哋香港人嘅品質係可以幾咁勇敢，幾咁和平，幾咁善良。我哋呢次證明咗嘅，就係證明咗呢啲嘢！而對我哋嚟講，對未來香港嚟講，對我哋嘅考驗，唔需要再考驗，全世界，我哋自己心中有數。未來嘅考驗，就係我哋嘅智慧。智仁勇，仁勇我哋都兼備，未來嘅考驗，係智慧，OK？大家唔使依家諗住，我哋轉話題，唔講喇！講夠喇！大家準備倒抽一口涼氣，轉話題好唔好呀？一、二、三!」



Article from : https://hk.celebrity.yahoo.com/news/黃子華棟篤笑講政治金句節錄---講佔中-071700827.html