圖片:Getty Images
「一國兩制」差異真係無處不在。
香港中文大學物理系博士課程今年入學試，考生主要係內地人，校方一度要求香港考生去深圳，與內地生一齊應考，爭拗一輪，本地生最後成功爭取留港考試。
一波未起，中英並用的試卷又起爭議，一半試題簡體字，有本地考生即場要求「繁體翻譯」或全英文卷，都話冇；要求見出試題的教授，又話教授返咗內地。
本地傳媒廣泛報道後，校方致歉，解釋本地生提供GRE成績就唔駛考試，以往考生幾乎全部係內地人，所以試卷用簡體字，今年首次有本地考生先至出事。校方應承將來考試統一用英文。
授課語言一樣出事，97%香港人用廣東話(練乙錚叫「香港話」)。舊年，香港城市大學一個原本以廣東話授課碩士課程，內地生佔6成，要求教授改用普通話講書，中港兩地學生「罵戰」，《人民日報》批評本地傳媒「炒作兩地矛盾」。
原來，2012/13年度研究生學額，本地生只有531人，非本地生1,876人，幾乎2:8比！
奶粉、幼稚園、大學到廣東道，兩地居民矛盾越演越烈，香港特區政府唔知有意冇意，嫌唔夠麻煩，經常火上加油。
上個月，教育局官方網站發表文章，指廣東話係「一種不是法定語言的中國方言」，普通話先至係「中華人民共和國的法定語言」。群情洶湧，教育局急急公開致歉，但短短道歉文章錯處多多，敗露原文係簡體字，後以電腦程式轉換為繁體字。又多一個疑問，點解教育局官員用簡體字寫稿？
農曆新年過後特首梁振英首次露面，表明反對政黨建議開徵陸路入境稅。特首有唔同意見唔出奇，但竟然挑撥，訓示香港人唔好「未富先驕」。
嘩！特首講乜話？原來香港人「富」要靠大陸客？開徵新稅就係「趕客」？好明顯，我哋特首講話唔係畀我哋聽嘅。
余若薇
沒有留言:
張貼留言